28 кастрычніка напярэдадні Дня Памяці ахвяраў сталінсіх рэпрэсій адбылося традыцыйнае шэсьце і мітынг “Дзяды”.

 Штогод беларусы з болем у сэрцы ўспамінаюць жалобную дату – 29 кастрычніка. У 1937 годзе ў ноч з 29 на 30 кастрычніка ў падвалах менскай турмы былі расстраляны самыя яскравыя і таленавітыя дзеячы культуры, асьветы, грамадзкія дзеячы. Яны ўсе да апошняга змагаліся за лепшую долю для нашай Бацькаўшчыны, адраджалі мову і культуру Радзімы. Увогуле за бальшавіцкія часы было рэпрэсавана больш за 1,5 мільёнаў найлепшых нашых землякоў.

 28 кастрычніка сьвядомыя беларусы прыйшлі на шэсьце каб ушанаваць памяць пакутнікаў. Шэсьце, на якім сабралося прыкладна 1500 чалавек, прайшло ад гадзіньнікавага заводу да Курапатаў. Людзі прыйшлі з кветкамі, з нацыянальнымі бел-чырвона-белымі сьцягамі гербамі Менску. У шэсьці прынялі ўдзел розныя арганізацыі, ініцыятывы, праекты і простыя людзі, якім неабыякавы лёс сваёй краіны.

 Пасьля шэсьця адбыўся традыцыйны мітынг, на якім ушанавалі памяць ахвяраў сталінскіх рэпрэсій хвілінай маўчаньня, добрымі словамі, малітвай. Праект “Вока”, “Трэці Шлях”, “Ініцыятыва!” усталявалі крыж у Курапатах у знак падзякі тым, хто змагаўся за разьвіцьцё і незалежнасьць нашай краіны, родную мову і культуру. Моладзь усклала кветкі і заспявала Магутны Божа.

Moladz.org