Прэзентацыя каталога "Рукапісная спадчына Янкі Купалы" адбудзецца 7 мая ў Дзяржаўным літаратурным музеі Янкі Купалы. Аб гэтым карэспандэнту БЕЛТА паведаміла вучоны-сакратар музея Алена Бурбоўская.

Паводле яе слоў, каталагізацыя рукапіснай спадчыны паэта з фондаў музея будзе садзейнічаць захаванасці каштоўнасцей і назаўсёды вызначыць права ўласнасці на яе дзяржавы і музея, што пацвярджаецца на міжнародным узроўні. Выданне каталога фінансавалася з Фонду прэзідэнта Беларусі па падтрымцы культуры і мастацтва. Ініцыятыва ж стварэння такога выдання належыць супрацоўнікам музея, якія паставілі мэту ўвесці ў шырокі ўжытак тыя скарбы, якія знаходзяцца ва ўласнасці ўстановы.

Матэрыялу ў фондах музея хапіла на дзве кнігі, і да канца гэтага года плануецца выданне яшчэ аднаго каталога. "Мы выдалі рукапісныя арыгіналы Янкі Купалы, для другога выдання засталіся карэктуры, дароўныя надпісы і сшыткі. Выданне будзе больш маляўнічае, больш ілюстраванае, чым першы каталог", - адзначыла вучоны-сакратар.

Каталог - навуковае выданне, ён цікавы для вузкага кола чытачоў, таму і тыраж яго невялікі - 300 экзэмпляраў, дадала Алена Бурбоўская.

//БЕЛТА