1 верасня ў межах кампаніі “Хочам вучыцца па-беларуску!” шэраг моладзевых рухаў правёў акцыю, прысвечаную Дню Ведаў.

У Мінску некалькі дзесяткаў актывістаў рухаў “Вока”, “Ініцыятыва!”, “Трэці шлях” каля ўвахода ў Міністэрства культуры ўсклалі кветкі, перавязаныя чорнымі стужкамі, да плаката з выявай падручніка беларускай мовы. Пасля гэтага ўдзельнікі хвілінай маўчання ўшанавалі фактычнае знікненне роднай мовы з адукацыі і культуры Рэспублікі Беларусь, бо не сакрэт, што ў Менску засталося толькі 2,2% школ з беларускай мовай навучання, а па рэспубліцы такіх школ не больш за 25%. Акцыя выклікала вялікую ўвагу сярод простых мінакоў, сярод якіх быў заўважаны і галоўны рэдактар «Советской Белоруссии» Павел Якубовіч. Аднак ён ад каментароў устрымаўся, у адрозненні ад большасці гледачоў, якія выказалі словы ўдзякі і падтрымкі ўдзельнікам акцыі.

“У будынку, дзе месціцца міністэрства культуры, знаходзяцца яшчэ і міністэрства інфармацыі , таксама і выдавецтва "Асвета" - установы, якія маюць непасродны ўплыў на развіцце і пашыренне беларускай мовы ў наша краіне. Ведаючы сучасны стан беларускай мовы, яны не надта імкнуцца палепшыць сітуацыю, а, нават, наадварот, падводзяць родную мову да труны, крок за крокам. Мэта флэш-моба - нагадаць супрацоўнікам міністэрстваў культуры і інфармацыі, што за поўнае знікненне беларускай мовы з грамадскага жыцця і навучальных устаноў яны будуць несці непасродую адказнасць”, адзначыў адзін з арганізатараў Алесь Апейкін.

Гарадзенскія актывісты таксама падтрымалі акцыю “Хочам вучыцца па-беларуску”.

У межах акцыі маладзены правялі флеш-моб, які адбываўся пад час правядзення канцэрту на плошчы Савецкай у Гародні. Гарадзенцы прыйшлі на канцэрт з падручнікамі і слоўнікамі беларускай мовы. Пад час мобу яны селі ў цэнтры плошчы з раскрытымі кнігамі. Такім чынам маладзены хацелі зьвярнуць увагу грамадскасці да беларускай мовы і імкнуліся даказаць, што мова жывая і мае шмат носьбітаў.

“На першую акцыю “Хочам вучыцца па-беларуску!” у 2004 годзе прыйшлі ўсяго некалькі дзесяткаў чалавек, а сёння ў адзін дзень адбыліся адразу чатыры флэш-мобы па ўсёй краіне, што мы лічам безумоўна дасягненнем грамадства”, адзначыў адзін з арганізатараў Віталь Дабранач адміністратар moladz.org.

Усе акцыі прайшлі без затрыманняў.

ПрэсЦэнтр “Моладзь.ОRG”