Сёння на Управе “БНФ” маладзевыя ініцыятывы “Трэці Шлях”, “Ініцыятыва” і інтэрнэт-праект “Moladz.org”  правялі сустрэчу з вядомым беларускім паэтам і пісменнікам  Нілам Гілевічам. На сустрэчы сабралося вельмі шмат моладзі і людзей, якія неабыякава ставяцца да беларускай літаратуры, ды і ўвогуле да культуры нашай Радзімы. Ніл Гілевіч з вялікім задавальненнем прачытаў свае вершы, у якіх яскрава бачны яго погляд на сур’ёзныя і вечныя тэмы, такія як праблема кахання, праблема выхавання моладзі, праблема жыцця і смерці. Таксама было закранута  пытанне  палітычнага  і сацыяльна-эканамічнага жыцця нашай краіны.

Як адзначыў адзін з арганізатараў  сённяшняй сустрэчы Аляксандар Апейкін: “Сучасная моладзь прагульвае ўрокі,  і настаўнікі ніяк не могуць прымусіць іх вучыцца, але ж  сёння на сустрэчы з Нілам Гілевічам зала была перапоўненна моладзю ад 16 да 25 год. І гэта ёсць іх культурніцкі пратэст супраць знішчэння беларускай  мовы і літаратуры міністэрствам адукацыі”.

На сустрэчы прысутнічалі журналісты, якія задалі Нілу Сымонавічу некалькі пытанняў наконт становішча школьнай адукацыі, а менавіта аб яго стаўленні да  скарачэння праграмы беларускай літаратуры, з якой прыбралі творы геніальных пісьменнікаў і паэтаў за іх грамадскую пазіцыю, якая не супадае з пазіцыяй пануючага рэжыму.

“Мы не можам зразумець, чаму ў краіне існуе такая непавага да сапраўдных і таленавітых літаратараў. На творах Быкава, Гілевіча, Барадуліна вырасла цэлае пакаленне сапраўдных беларусаў,  і таму на нашу думку яны вартыя, каб моладзь іх вывучала ў школах”, адзначыў Віталь Дабранач,  адміністратар  www.moladz.org.

На  сустрэчы прысутнічала  прыблізна 60 чалавек, якія на прыканцы мерапрыемства  на працягу пяці хвілінаў гучнымі апладысментамі віталі класіка беларускай літаратуры і яго неўміручую творчасць.